قال الرئيس عبد الفتاح السيسي رئيس الجمهورية، اوعي تنسوا إن اللي احنا فيه ده كرم من ربنا سبحانه وتعالي.. ده فضل ربنا علينا .. وكل الشكر والحمد ليك يارب على دعمك وسندك ونصرك وتوفيقك لينا.. ودايما الفضل يعود لأصحابه وأصحابه هو ربنا.

جاء ذلك خلال الندوة التثقيفية الـ42 والتي تنظمها القوات المسلحة بمناسبة الذكري الـ52 لانتصارات حرب أكتوبر المجيدة.

وأضاف السيسي: اليوم اللي يحصل فيه اقتتال الساعة فيه تأخر البلد شهور وسنين.. مش اليوم والشهر والسنة.. احنا في حرب الإرهاب الـ10 سنين صرفنا 100 مليار جنيه .. غير اللي سقط من الجيش والشرطة والقضاء.. وأبناء الشعب.

وتابع: الـ100 مليار جنيه تكلفة القوات المسلحة.. والـ450 مليار دولار هو تكلفة ما بعد 2011 وحتى 2014 والأحداث التي حدثت في مصر وتأثيرها على الاقتصاد في مصر.. وأنا لازم اسجل هنا.. كنت دايما براهن على الناس.. واقول الناس عندها قلب وعقل.

واستكمل قوله: ورغم إن العقل يلاقي الظروف صعبة والاوضاع الاقتصادية قاسية، ولكن القلب يقول ان هناك محاولة جادة من الدولة لتجاوز ده.. والحرب مش دايما بالسلاح.. واللي احنا فيه ده هو حرب لتغيير واقعنا الاقتصادي واحوالنا للافضل.

وقال: هذا شكل من اشكال الصراع والاقتتال وكنت متأكد بفضل الله .. ان كتير يكون متحسب ان الناس تزهق من كده ويبقي في نقاش كتير في كل مرحلة بنتحرك فيها من الوزراء ومسئولين اخرين ورجال فكر وثقافة.. يقولوا مش تعملوا حساب للرأي العام.. والله احنا بنعمل حساب للرأي العام اوي .. والتحدي كبير أوي.

وأوضح: ولابد من فضل من الله نجتهد ونبذل اقصي جهد بيكم يا مصريين بتحملكم والله العظيم انا ما بجامل.. لازم نعبر ظروفنا الصعبة وبفضل الله اقتصادنا يتحسن بما يليق بيكم وبأبنائكم واحفادكم.

تابع: وانا متفائل جدا جدا جدا بحالنا دلوقتي يمكن في الكلمة هقول بعض النقاط الايجابية اللي حققناها وربنا ساعدنا فيها كالعادة .. عايز اقولكم ان الحرب مش بس حرب بالسلاح.. لا ده حرب بالمعرفة والاقتصاد والعلم والوعي والارادة والثقة وبالتحمل.. دي كلها شكل من اشكال الاسلحة.. وعشان كده هما لما بيحاولوا .. وعملوا حركة السفارات .. مكر والله .. كذب وافك.. لكن السياسة كده .

ولفت: عشان كده شوفتوا العزة .. شوفتوا.. هو دايما.. ربنا ما يحرمنا دايما من دعمه ونصره ويشرفنا دايما برضاه.